Одбележани успесите и анализирани резултатите од учеството на меѓународните олимпијади по хемија, 2023 година

На 20 септември 2023 во библиотеката на Институтот за хемија традиционално, се одржа настан на кој се одбележa постигнатиот успех на меѓународните олимпијади по хемија во текот на 2023 година. Истовремено, беа доделени и медалите од овогодинешната Македонска хемиска олимпијада, натпревар преку кој се врши селекција на најдобрите ученици кои ја претставуваат Македонија на светските натпревари по хемија. Согласно резултатите од серијата селекциони натпревари, беа доделени медали на петмината најдобри ученици:

  • Филип Бојаџиевски, СУГС Гимназија „Орце Николов“, Скопје - златен медал
  • Петар Мирчевски, СОУ Гимназија „Мирче Ацев“, Прилеп - златен медал
  • Марио Ванчоски, СОУ Гимназија „Славчо Стоименски“, Штип - сребрен медал
  • Марија Петрова, СУГС Гимназија „Раде Јовчевски-Корчагин“, Скопје - сребрен медал
  • Иван Костевски, СОУ Гимназија „Славчо Стоименски“, Штип - бронзен медал

Беа доделени и благодарници на наставниците од средните училишта:

  • Ирена Мишевска, СУГС Гимназија „Орце Николов“, Скопје
  • Блаже Димески, СОУ Гимназија „Мирче Ацев“, Прилеп
  • Марјана Младеновска Петрова, СОУ Гимназија „Славчо Стоименски“, Штип
  • Гордана Геческа, СУГС Гимназија „Раде Јовчевски-Корчагин“, Скопје

На настанот беше разгледан прогресот на хемискиот тим низ годините и беше констатирано континуирано подобрување на резултатите. Оваа година, тимските остварувања укажуваат на досега најдобар пласман. Тоа се потврдува и со бројот на освоени медали на Меѓународната олимпијада по хемија - IChO (International Chemistry Olympiad). Оваа година, македонскиот тим освои 3 бронзени медали и една пофалница. Освојувачите се:

  • Филип Бојаџиевски, СУГС Гимназија „Орце Николов“, Скопје - бронзен медал
  • Петар Мирчевски, СОУ Гимназија „Мирче Ацев“, Прилеп - бронзен медал
  • Марио Ванчовски, СОУ Гимназија „Славчо Стоименски“, Штип - бронзен медал
  • Марија Петрова, СУГС Гимназија „Раде Јовчевски-Корчагин“, Скопје - пофалница

Домаќин на овогодинешната Меѓународна олимпијада по хемија беше Цирих, Швајцарија. На олимпијадата учествуваа 348 ученици од 89 држави од целиот свет.
На настанот беа доделени благодарници на сите поддржувачи на СХТМ и сите оние кои дадоа свој придонес кон постигнувањето на овој успех. СХТМ изразува искрена благодарност на:

  • Johnson Matthey за доделениот проект насочен кон обновување на лабораторијата во која, меѓу другото се подготвува и тимот за учество на олимпијадите.
  • Агенција за млади и спорт за обезбедените финансии за учество на учениците на олимпијадите.
  • Амбасадорот на Руската Федерација во Скопје и компанијата Лукоил за обезбедување финансии за учество на Меѓународната олимпијада – Менделеев.
  • Фармахем за континуираната финансиска помош за реализација на лабораториските подготовки.
  • Титан, цементарница УСЈЕ за финансиската помош при доопремување на лабораторијата за подготовка на учениците.
  • Талија, Орнамакс, семејство Трајкови, The Centaur Company, УМНО.МК, ПМФ...

На Институот за хемија, Природно-математички факултет се одвиваа континуирани подготовки во кои учествуваа професорите од Институтот за хемија при ПМФ: Миха Буклески, Слоботка Алексовска, Марина Стефова, Владимир Петрушевски како и студенти - поранешни учесници на олимпијадите и медалисти: Михаил Трајков, Дарко Стојчев, Александар Трајковски. Дополнително, кон подготовките се приклучија и професорите Владимир Ивановски, Љупчо Пејов, исто така од Институтот за хемија.

На настанот се обрати и Деканот на ПМФ, проф. д-р Александар Скепаровски, кој ги поздрави присутните, а на учениците им го честита остварениот успех на меѓународните олимпијади, мотивирајќи ги да продолжат посветено да работат и во иднина. Тој се заблагодари и на поддршката која ја имаме од страна на општествено одговорните компании, но и од државните институции, пред сѐ од Агенцијата за млади и спорт, но и од Министерството за образование и Наука.

По обраќањето на проф. д-р Марина Стефова, раководител на секцијата за образование во рамките на Сојузот на хемичарите и технолозите на Македонија, беа доделени медалите на учениците учесници на Македонската хемиска олимпијада. Проф. Стефова се заблагодари за помошта која СХТМ ја добива од сите институции и апелираше за изнаоѓање системно решение за проблемот со финансирање. 

На крајот, медалистите имаа можност да ни ја доловат атмосферата на Меѓународната олимпијада по хемија споделувајќи ги нивните впечатоци и искуства.

Обраќање на Деканот на Природно-математичкиот факултет во Скопје.

Претставници од општествено одговорната компанија, „Johnson Matthey“ од Скопје и Велика Британија.

Анализата на постигнатите резултати и напредокот во текот на годините, ги претстави проф. д-р Миха Буклески.

Проф. д-р Марина Стефова, раководител на секцијата за образование во рамките на СХТМ, ги додели дипломите на учениците и наставниците од средните училишта.

Излагање на впечатоците на учениците.

Дел од присутните на настанот кој се одржа на Институот за хемија, Природно-математички факултет.

 

Соопштение
03.8.2022

Драги натпреварувачи, 

По успешно завршената 2022 година, со освоени два бронзени медала, ги почнуваме активностите за следниот циклус натпревари. Најдобро пласираните од државниот натпревар за средни училишта - 2022 се поканети да учествуваат на квалификациониот натпревар за избор на 10 ученика кои интензивно ќе се подготвуваат за учество на меѓународните олимпијади по хемија во 2023 година.  

  • Право на учество: оние кои биле дел од државниот натпревар 2022 и ги имаат постигнато следните резултати:
  • I категорија: првите 20,
  • II категорија: првите 10
  • III категорија: првите 11.
  • Термини за натпревари: 
    • квалификационен натпревар: декември 2022 година. Натпреварот ќе се состои од теоретски проблеми, ќе трае 5 часа и ќе се одберат десетмина. 
    • селекционен натпревар: март 2023 година и ќе вклучува два дела, теорија и експерименти. Двата дела траат по 5 часа (во два различни дена) и ќе се одберат четворица кои ќе го сочинуваат македонскиот тим за учество на олимпијадите. 
  • Материјали: ќе бидат доставени по електронски пат.  
  • Подготовки: Десетмината избрани на селекциониот натпревар ќе продолжат со подготовки на Институтот за хемија. 
  • Пријавување: Учеството на селекциониот натпревар треба да го потврдите (или откажете) со праќање порака на е-mail: mihabukleski@pmf.ukim.mk, најдоцна до 15 август. Во e-mail-от треба да наведете: Име и презиме, училиште и град, школска година (во 2023), ментор.

 

27-ми Конгрес на СХТМ

25–28 септември, 2024, Охрид

Вести